24. Kaika suvõülikuul tulõ 10.-12. põimukuul (10.-12.08) 2012 Harglõn

Kaika suvõülikuul om võrukeeline ja -meeline suvõkuul, miä edimäst kõrda oll´ 1989. aastagal Kaikal - tuust ka sündmüse nimi. Egä aastak mindäs ülikooliga esi kotussõdõ, et vana Võrumaa esi kihlkunna ja kandi võrdsõlt tähelepanu saassi ja kõnõldas tuukandi kodu- ja aoluust. Seo aastaga 24. suvõülikoolin peedäs loengit ja kaias Harglõ kandin ümbre, muiduki tulõ latsikoolitus, umakeeline tiatri ja simman.

Loengit peedäs Harglõ kihlkunna vanõmbast ja vahtsõmbast aost (rahvaluulõ- ja perimüs, kiil, kotussõnime, rahvarõiva, kooli ja mõtsavelli aolugu), niisamatõ vannu maiu praavitamisõst, võru kirändüsest ku võru as´ast ja liikmisest. Suvõülikooli rektor om Saru juuriga Kõivupuu Marju, kiä om kõnõlõma kutsnu hää ja targa inemise, nt Kiho Toomasõ, Orasõ Janika, Pae Taavi, Fastrõ Mariko, Saarõ Evari, Velskri Mardi, Allasõ Tiia ja viil tõisigi.

Harglõ kandiga tutvassaamisõs tetäs bussireis Koivaliina, Taheva mõisahe ja ökoküllä. Jalaga saa ümbre kaia Harglõ kalmuaian ja kerigun. Kiä taht, või minnä sõitma kanuuga, a tuust piät ette teedä andma. Kõiki huvikäüke vidävä tiidjä inemise. Viil avitas taa kandiga tutvas saia Kotovi Toivo kõrraldõt matk tsihilöüdmisega (orienteerumisõga).

Kultuuriprogrammin om kirändüsõdak Indrek Harglaga, paigapäälse rahva näütemängu nii latsilt ku suurilt, niisamatõ Talna Võro Seldsi näütemäng. Tulõ ka simman, kon härgütüses tandsva kohaligu tandsja ja perän saa egäüts tandsupõrmandu pääle minnä.

Õkvalt suvõülikooli alostusõn 10. põimukuu pääväl kell 13 om Harglõ kerigun võrukeeline jumalateenistüs. Tuu, et uman keelen võissi kerikut pitä, tundus parla esieräline, a 19. aastagasaal oll´ tuu jo tävveste harilik asi!

Viil näüdätäs vahtsit võrokeelitsit raamatit, vallalõ om väiku filmitarõ ja raamadulett, saa kaia näütüst kohaligust käsitüüst ja Taheva valla maiust. Paigapäälitse naasõ ja asõnduskodo latsõ hoolitsõsõ ka väiku kohviku iist. Ku kiäki taht viil uma söögiga kaubõlda, sõs andku hindäst teedä Monika Rogenbaumilõ (tel [phone]).

Latsikoolitusõn opatas väiksembile suvõülikooli opilaisilõ võru kiilt, rahvalaulõ, -mängõ ja -tandsõ, meisterdedäs, tetäs hobõsõsõitu ja opatas pilli mängmä. Eräle põnnõv ja tarvilinõ asi om esmaabioppus, kon latsilõ seletädäs kõgõ tähtsämbit asju tuu kottalõ, kuis hinnäst ja tõisi hoita vai hädä kõrral avita.

Suvõülikuul tetäs vallalõ riidi, 10. põimukuul kell 12 Harglõ koolimaja man ja pandas kinni pühäpäävä, 12. põimukuul kell 12. Suvõülikuul om päämädselt Harglõ maakultuurimajan, süümine, magaminõ ja latsioppus Harglõ koolimajan.

Üüd saa olla Harglõ koolimajan. Egä üümajatahtja piät üten võtma madratsi ja muu magamisõs tarvilidsõ kraami. Kiä taht, saa koolimaja manu telgi üles panda. Niisamatõ või egäüts otsi hindäle hää üümaja mõnõn Harglõ kandi turismitalun. Lähkün omma näütüses Hargla jahimaja (Andres Rõõmus, tel [phone], [e-mail]), Niidu turismitalu (Aliise Kond, tel [phone]), Kaldavere OÜ hostel (Andres Maisla, tel [phone]) ja Nakatu turismitalu (tel [phone], [e-mail]).

Süvvä saa Harglõ kooli sööklan. Süvvätahtja piät hindäst ette teedä andma. Ette teedäandjilõ mass kolmõ päävä süük (7 söögikõrda) 15 eurot, latsilõ alla 10 aastaga 8 eurot. Noilõ, kiä hindäst ette teedä ei anna, mass kolmõ päävä süük kokku 18 eurot. Nuu, kiä hindäst ette teedä ei anna, piät arvõstama tuuga, et süvvä ei pruugi jakkuda ja sõs tulõ ellä uma leeväkoti pääl. Harglõ maakultuurimajaga saman huunõn om ka puut, miä suvõülikooli aigu ka vallalõ om. Üts süük (õdak, lõuna) eräle ostõn mass 3 eurot. Umast söögisoovist tulõ ildampa 7. põimukuus teedä anda kokk Heli Saagilõ (tel [phone], [e-mail]).

Suvõülikooli täpsemb aokava andas teedä juulikuu keskpaigan Ummamuudu listin, Taheva valla külli teedüstahvliide pääl, Taheva valla kodulehe (www.taheva.ee), Võro instituudi kodolehe (www.wi.ee) ja Võro Seldsi VKKF kodolehe (www.voroselts.ee) pääl ja 7. põimukuu Uman Lehen.

Kõrraldaja omma Harglõ kandi inemise Harglõ Maakultuurimajast, Harglõ Koolist ja latsiaiast, Harglõ ja Koikküla Raamatukogodõst, Harglõ Maanaisi Seldsist, MTÜ Parmu Ökoküläst, EELK Harglõ Kogudusest, Taheva vallavalitsusõst, Võro Seldsist VKKF ja Võro Instituudist.

Suvõülikooli tugõva rahaga Eesti Kultuurkapitali Valgamaa ekspertgrupp, Rahvakultuuri keskusõ Vana Võromaa kultuuriprogramm, Taheva vallavalitsus ja Valgamaa Partnerluskogu LEADER programmist.

Kontakti:

Pääkõrraldaja Monika Rogenbaum [e-mail], tel [phone]

Rektor Marju Kõivupuu [e-mail], tel [phone]